| अङ्क 47 | चैत्र 2069 | वर्ष 9 |
एउटा बूढो मानिसको धन्यवाद
--वाल्ट ह्विटम्यान
यो बुढेसकालमा धन्यवाद छ
धन्यवाद छ- म जानुअघि।
मेरो जिन्दगीभरको स्वास्थ्यका लागि
कोमल घाम र हावालाई धन्यवाद छ।
मेरो जिन्दगीका लागि जिन्दगीलाई धन्यवाद छ
मूल्यवान् सम्झनाहरूका निम्ति
आमा, बा, साथी र सहेलीहरूलाई
धन्यवाद छ मेरो।
मैले बाँचिआएका सारा दिन,
विप्लव र शान्तिका दिनहरूलाई धन्यवाद छ।
कोमल शब्द बोल्नेहरूलाई
प्रेमले स्पर्श गर्नेहरूलाई
पदेशदेखि उपहार पठाउनेहरूलाई
भाग्दा शरण दिनेहरूलाई
मेरो धन्यवाद छ।
दूर-दिगन्तका अपरिचित प्रिय पाठकहरू
तपाईँहरूलाई धन्यवाद छ।
यद्यपि हामीले कहिल्यै भेटेनौँ, न त
कहिल्यै अब कहीँ भेट्ने छौँ
तर हाम्रा हृदय मिले, त्यसैले धन्यवाद छ।
मेरो धन्यवाद छ जीवन जिउनेहरूलाई
मानिसका जमात, प्रेम र संवादहरूलाई
मेरा प्रिय पुस्तकका स्रष्टाहरूलाई
धन्यवाद छ मजबुत र कोमल युवाहरूलाई
जसले सधैँ जीवन र स्वतन्त्रताका लागि लडे
म-नजिक र टाढाका अनाम भूमिहरूमा।
मेरो धन्यवाद छ वीर सपूतहरूलाई
प्रिय गीतका सर्जकहरूलाई
सुन्दर सोचका निर्माताहरूलाई
मानिसका हृदय जोड्नेहरूलाई
मेरो युगका महान् नेताहरूलाई धन्यवाद छ।
म जानुअघि उज्यालाका
अग्रदूतहरूलाई धन्यवाद छ
म जीवनको मैदानबाट फर्कन लागेँ
एक यात्री जो आफ्नै सीमासम्म पुगेर उभिएँ
तपाईँहरूका कारण मेरो जीवन खेर गएन
सबैलाई धन्यवाद छ।
--
अनुवादः मनु मन्जिल
 | प्रतिक्रियाहरू |